काठमाडौँ ११ चैत २०८१ / क्रोएशियालाई पेनाल्टी सुटआउटमा हराउँदै फ्रान्स युएफा नेसन्स लिगको सेमीफाइनल प्रवेश गरेको छ।​ क्रोएशियासँग पहिलो लेगमा २–० गोलले पछि परेको फ्रान्सले उत्कृष्ट पुनरागमन गरेको हो।

यूईएफए नेसन्स लिग फुटबलको सेमिफाइनल समीकरण पूरा भएको छ । सोमबार बिहान भएका खेलहरूमा जर्मनी, स्पेन, फ्रान्स र पोर्चुगल विजयी भएसँगै अन्तिम चार समीकरण पूरा भएको हो ।

अब फाइनल प्रवेशका लागि जुन ४ मा हुने पहिलो सेमिफाइनलमा घरेलु टोली जर्मनी र पूर्वविजेता पोर्चुगल भिड्नेछन् । यो खेल म्युनिखमा हुनेछ । यस्तै दोस्रो सेमिफाइनलका लागि साविक विजेता स्पेनले पूर्वविजेता फ्रान्स प्रतिद्वन्द्वी पाएको छ । यो खेल जुन ५ मा हुनेछ । यो खेल जर्मनीकै स्टुगार्डमा हुनेछ ।

सेमिफाइनलमा पराजित टोलीले जुन ८ मा तेस्रो स्थानका लागि खेल्नेछन् । सो खेल सकिएपछि त्यही दिन फाइनल खेल हुनेछ । तेस्रो स्थानका लागि हुने खेल स्टुगार्डमा र फाइनल म्युनिखमा हुनेछ ।