काठमाडौँ २६ जेठ / प्रधानमन्त्री तथा मन्त्रिपरिषद् कार्यालयले गृह सचिव गोकर्णमणी दुवाडीलाई अध्यागमन कार्यालयमा दरबन्दी भन्दा बढी कर्मचारी पठाएकोमा सात दिने स्पष्टीकरण सोधिएको छ ।

गृह सचिव दुवाडीलाई लेखेको पत्रमा दरबन्दी बढी कर्मचारी खटाउनको कारण माग गर्दै त्यसको विवरण उपलब्ध गराउन प्रधानमन्त्री कार्यालयका सचिव गोविन्दबहादुर कार्कीले आग्रह गरेका छन् । विमानस्थल अध्यागमन कार्यालयमा दरबन्दी भन्दा बढी खटिएका कर्मचारीलाई केही दिन अघि फिर्ता गरिएको थियो ।

गृह मन्त्रालय अन्तर्गत त्रिभुवन अन्तर्राष्ट्रिय विमानस्थल अध्यागमन कार्यालय र केही जिल्ला प्रशासन कार्यालयहरूमा दरबन्दीभन्दा बढी कर्मचारी राखिएको तथा दरबन्दी नभएका स्थानमा काजमा कर्मचारी खटाइएको विषयमा समाचार प्रकाशित भएपछि काजमा खटिएका कर्मचारीको सबै विवरण उपलब्ध गराउन आग्रह समेत गरिएको छ।

भिजिट भिसा दुरुपयोग प्रकरणमा गृह सचिव दुवाडीका विश्वास पात्र मानिएका सहसचिव तीर्थ भट्टराईलाई अख्तियार दुरुपयोग अनुसन्धान आयोगले अनुसन्धानमा तानेपछि विमानस्थल स्थित अध्यागमन कार्यालयमा दरबन्दी भन्दा बढी कर्मचारी खटाइएको पाइएको थियो ।

प्रधानमन्त्री कार्यालयका सचिव कार्कीले गृह सचिव दुवाडीलाई सात दिनभित्र दरबन्दीभन्दा बढी कर्मचारी कार्यरत निकाय र ती कर्मचारीको नामसहितको विवरण उपलब्ध गराउन पत्रमा भनिएको छ।