काठमाडौं, भदौ १२। आज हिन्दु धर्मावलम्बीहरूको प्रमुख पर्व जनै पूर्णिमा देशभर श्रद्धा र उत्साहका साथ मनाइँदैछ।

पूर्णिमाका दिन बिहानैदेखि वैदिक सनातन धर्मावलम्बीले नदी, ताल, तलाउ, पोखरीमा गई स्नान गरेर गुरु पुरोहितबाट रक्षासूत्र बाँध्ने प्रचलन छ । तागाधारीले गुरु पुरोहितले विधिपूर्वक मन्त्रिएको यज्ञोपवीत एवं डोरो (रक्षासूत्र) धारण गरेमा नकारात्मक तत्वबाट सुरक्षा प्राप्त हुने धार्मिक विश्वास छ ।

यस अवसरमा हिन्दु धर्मावलम्बीहरूले बिहानै स्नान गरी नयाँ जनै (यज्ञोपवीत) धारण गर्ने तथा पुरानो जनै फेर्ने चलन छ। विभिन्न धार्मिक स्थल तथा नदी, कुण्ड र तीर्थस्थलमा स्नान तथा पूजाआजा गर्न श्रद्धालुको भीड लाग्ने गरेको छ।

जनै पूर्णिमाका दिन दिदीबहिनी तथा दाजुभाइबीच रक्षाबन्धन तथा राखी बाँध्ने परम्परा पनि रहेको छ। यस पर्वलाई धार्मिक तथा सांस्कृतिक महत्व बोकेको पर्वका रूपमा मनाउने गरिन्छ।

नेपालका विभिन्न समुदायले आ–आफ्नै मौलिक परम्परा र संस्कृतिअनुसार जनै पूर्णिमा मनाउने गरेका छन्। यस दिन क्वाँटी खाने प्रचलनसमेत रहेको छ।