काठमाडौं, भदौ २९। भदौ १० गते आएको भोटेकोशी बाढीपछि सञ्चालन भइरहेको खोज तथा उद्धार अभियानका क्रममा हालसम्म १ हजार ३९२ जनाको शव फेला परेको छ। अझै ४ हजार ८९ जना सम्पर्कविहीन रहेको नेपाल प्रहरीले जनाएको छ।

प्रहरी प्रधान कार्यालय नक्सालका अनुसार फेला परेका शवमा ५४२ पुरुष, ३३६ महिला तथा ५१४ वटा आंशिक अंग रहेका छन्। तीमध्ये १०३ शवको पहिचान गरी आफन्तको जिम्मा लगाइसकिएको छ।

नेपाल प्रहरीका प्रवक्ता अविनारायण काफ्लेका अनुसार बेपत्ता हुनेमा स्वदेशी नागरिकतर्फ २ हजार ९०७ पुरुष र ५७२ महिला छन्। यस्तै, विदेशी नागरिकमध्ये २७२ पुरुष र ३२८ महिला अझै सम्पर्कमा आउन सकेका छैनन्।

बाढी प्रभावित क्षेत्रबाट हालसम्म ९ हजार २८७ जनाको उद्धार गरिएको प्रहरीको तथ्यांक छ। उद्धार गरिएकामा ६ हजार ४०७ पुरुष, २ हजार ८३० महिला र पहिचान खुल्न नसकेका ५० जना रहेका छन्। उद्धारपछि २ हजार ७८१ जनालाई होल्डिङ सेन्टरमा राखिएको प्रवक्ता काफ्लेले जानकारी दिएका छन्।

बेपत्ता नागरिकको विवरण यकिन गर्न तथा फेला परेका शवको पहिचानका लागि प्रहरीले डीएनए परीक्षणको प्रक्रिया अघि बढाएको छ। ठूलो संख्यामा शवको सनाखत हुन बाँकी रहेकाले मृतक र सम्भावित आफन्तको डीएनए नमुना संकलन गरी पहिचान गर्ने कामलाई प्राथमिकता दिइएको प्रहरीले जनाएको छ।

भोटेकोशी बाढीबाट प्रभावित विभिन्न क्षेत्रमा बेपत्ताको खोजी, उद्धार तथा शव व्यवस्थापनको कार्य निरन्तर भइरहेको छ। खोज तथा उद्धारमा नेपाल प्रहरी, नेपाली सेना, सशस्त्र प्रहरी बललगायत सम्बन्धित सरकारी निकायका टोली परिचालित छन्।

प्रहरीका अनुसार बाढीबाट भएको मानवीय क्षतिको अन्तिम विवरण अझै संकलनकै क्रममा छ। खोजी अभियान पूरा हुँदै गएपछि फेला पर्ने शवको पहिचान र बेपत्ता व्यक्तिको अवस्था यकिन भएसँगै क्षतिको वास्तविक तस्वीर थप स्पष्ट हुने अपेक्षा गरिएको छ।